Alanos

Os alanos[1] fuoron un pueblo iranico y d'orichen sarmata que dica fins d'o sieglo IV yera establito en as estepas d'Europa Oriental a l'este d'os ostrogodos y a lo norte d'o Caucas. A fins d'o sieglo IV o suyo territorio fue invadito por os hunnos y muitos alanos s'ixemenoron por Europa y Africa chunto con os pueblos chermanicos que invadioron l'Imperio Romano, encara que a diferencia d'os chermans nunca no formoron un estato propio en Europa Occidental. Una part d'os alanos quedoron en o suyo territorio y atros rematoron en as costeras septentrionals d'o Caucas, on fundoron o reino d'Alania. Os alanos caucasians d'a Edat Meya que quedoron dimpués d'a invasión mongol se convertioron en os osetas actuals. Part d'os alanos caucasians medievals fuyoron d'os mongols con os cumans y se refuchioron primero en Moldavia (diocesi de Cumania), y dimpués en Hongría. Os emperadors paleologos de l'Imperio Bizantín feban servir a los alanos como principals mercenarios cuan tamién feban servir a los almogavars.

Os alanos en Hispania

O reino anán en Hispania.
O reino vandalo en Africa.

O 31 d'aviento de l'anyo 406 una part d'os alanos, que yera baixo o mando de Respendial cruzó o río Rin chunto con part d'os sueus y cuasi toz os vandalos y penetroron en l'Imperio Romano d'Occident dedicando-se a lo saqueyo. En l'anyo 409 arriboron en Hispania, on a población hispanorromana s'habió de defender por os suyos propios meyos, y se repartioron arias d'actuación. Os alanos se quedoron a Lusitanica y a Cartachinense.

Os romanos ninvioron a los visigodos contra os invasors iranicos y chermanicos presents en a Hispania, que fuoron exterminatos en part entre os anyos 416 y 418. Os restos d'os alanos emigroron chunto con os vandalos a lo Norte d'Africa y rematoron asimilatos por os vandalos.

S'ha quiesto relacionar o toponimo Mont Alano con o fugaz paso d'os alanos en a peninsula iberica. Tamién s'ha quiesto relacionar a los alanos con una mayor frecuencia d'os grupos sanguinios B y AB en as provincias d'o centro-ueste on estioron presents con respecto a las atras provincias on no i habió presencia alana.

Os alanos en Galia

Os alanos que no entroron en Hispania se quedoron en a Galia. Enta l'anyo 414 una horda alana saqueyaba l'aria d'a Garona meya, y atra horda, baixo o mando de Sambida saqueyaba a cuenca d'o Roine arredol de Valence. A colla mes poderosa d'alanos en Galia yera baixo o mando de Goar, que pasó a lo servicio d'os romanos en Renania, y fue acantonata por Aecio en a Loira meya pa controlar a los visigodos y tallar o paso a los hunnos d'Atila. Cuan Atila asitiaba Orliens os galorromanos consiguioron levantar o sitio gracias a l'aduya d'os alanos de Goar. Estos alanos tamién luitoron chunto con os romanos y visigodos en Campus Mauriacus en l'anyo 451 contra os hunnos. En a "Cronica de los Conquiridors" parlan d'una colla d'alanos en Galia que colaboraba con os romanos contra os hunnos.

A la fin os alanos acantonatos en Galia, que encara yeran nomadas, no complioron o foedus pactato con os romanos y ocuporon con os suyos rebanyos nuevas tierras, dedicando-se tamién a lo saqueyo. A fins d'o sieglo V y principios d'o sieglo VI os exercitos alanos fuoron destruitos y os restos d'alanos s'asimiloron a la población cheneral galorromana.

Mencions en fuents aragonesas

Os alanos d'o periodo d'as invasions son mencionatos como alanos cuasi siempre, con poquetas excepcions. En a "Cronica de los Conquiridors" parlan d'os alanos en o capítol dedicato a Atila:

Pues estos dos hermanos, auiendo grant et cruel exercitu de Huncnos et passando por Germania, inuadieron las Gallias, todas las cosas destruyendo por fierro et por fuego et por rapinas, et talando et matando todas gentes. Finalment pressas las ciudades et derrobadas, assitiaron la ciudat de Orliens : laqualcosa huyendo el emperador Valentiniano, aplego grant exercitu et enbio enlas Gallias al illustre varon Ecio, consul patricio ; elqual, ydo enlas Gallias, priso consi a Theodorico, rey de los Ystregodos, fillo qui fue de Criario rey, hermano de Uallamer et de Todomir, delos quales es fecha mencion de part de suso enla vida de Honorio et de Theodosio. Mas por meritos de sant Auiano, bispe de la dicha ciudat, Diosguardo la ciudat de poder delos enemigos, et assi como sant Guibilino, rey delos Alanos, por el miedo que auien de Atilla, lo huuies permesso liurar la dicha ciudat, Dios por meritos del dicho santo quiso que aquella cosa fues reuelada. Atendiendo et alos otros reyes delos Videgodos et occuparon la ciudat, et porque auian sospechoso a san Gibilindo, fizieron bien guardar la ciudat, et ordenaron que lo pusiessen en medio de la batalla con su gent ; et Atilla que lo supo huuo miedo dela batalla et demando de nueuas a algunos que yuan dela part delos enemigos, et dixieronle que sus enemigos no eran tantos ni tan bien ordenados como le auien dicho et que no le calie temer dela batalla; mas no le dizien verdat. Et era enlos campos de aquellas partidas vna altura o montanya la qual cada vno delos exercitus cuydauan occupar, et prisieron los Huncnos la diestra part et los Romanos con los Godos la siniestra; los quales desordenaron por tal manera que pusieron ala part diestra de lur batalla, atendendo con los Uidegodos ala siniestra.

Tamién los mencionan en a "Cronica de Sant Chuan d'a Penya.

Et depues de aquesti Valient; et en tiempo de aquesti los godos tenyan lur senorya mayor en Tolosa. Et aquesti rey prendió las tierras de Bética et de Galicia, las quales tenían los vándalos et los alanos; et depues de aquesti Goodorenus; et depues su filio Turison; et depues su hermano Trodoricho. Et depues de aquesti regnó su hermano Euricho. Et aquesti prese en España la prouincia de Tarragona, et depues de aquesti regnó su fillo Alarico;

Una d'as pocas excepcions ye en a traducción herediana de "Historia Romana" de Pavlo Diacono on podemos leyer alanos:

et fuert Jnstruydas en armas et en cauallos co es alanos hunos et godos se combatio theodosio con ellos en muchas g(ran)des batallas
et fizieron foyr el enemigo vltra mar / En aquel t(iem)po demientre los vuandalos et los alanos tribulauan espanya honorio enuio a defesar aq(ue)lla castino duque co(n) huest
et entretanto fueron en ayuda de los Romanos los burgunyo(n)s et los alanos con ssa(n)gibano lur Rey elos franceses et los Saxons / Ripariols bretones Sarmates armocians licians et quasi los pueblos de todo occident

Os cans que presuntament introdució en Occident este pueblo iranico yeran conoixitos como alanos, y en os conflictos d'a Unión Aragonesa contra a monarquía se menciona un can alán que causó un problema:

hombres, e después a pocos días el Bort de Concud hubo brega en la ciudat con los de la dita Unión sobre qui un alán que traya en dito Bort, del dito rey, mordió a uno de la ciudat, por lo que se albolotó la ciudat contra el dito Bort, et fueron armados...

Os alanos caucasians (orichinarios d'o Reino d'Alania) son mencionatos en o "Libro de los Emperadors" como alanes (os textos medievals no gosaban representar graficament os plural en -ns de l'aragonés). Manimenos en a Cronica de Morea los mencionan como alanos.

En aquesti tempo l'emperador fizo un fillo con su esposa María, la cual era de la generación de los alanes, al cual puso nombre Costantino; e aprés lo han coronado emperador.

[2]

En "La Flor de las Ystorias d'Orient de Haitón, tradueita por a escuela de Chuan Ferrández d'Heredia nombran l'antiga Alania como Comarca Alame y Aloen como una rechión d'Armenia:

Enel Regno de iorgie deues orient comarca a vna grant montanya q(ue) es clamada alborc et aquí habitan muchas naçiones de gentes et por aq(ue)sto es clamada aquella comarca alame et de aq(u)i se stiende el Regno de iorgie por ocçident deues septemtrion entro ha vnas prouinçias del Regno de turquia el luengo del regno de Iorgie se stiende por la ribera de la Mar Mayor deues mig iour et comarca con Erminia la Grant.
exçeptuado el regno de Beas, que es en Gorgie, et vna encontrada del regno de Arminia que es clamada Aloen. Aquestas dos encontradas se tuuieron contra los moros.

Chuan de Mandevilla leyó a Frai Haitón y en transmitió as informacions sobre o Caucas y Armenia. D'esta traza en a versión aragonesa d'o "Libro d'as Marabillas d'o Mundo" parlan de l'aria de Darial, (Dar-i-Alán, puerta d'os alanos), on encara hue viven os osetas d'o Caucas y la nombran como Tierra Alamo:

empues es el Regno de georgie qui comiença vers vna montaynna grant qui es clamada absor do fincan muchas diuersas gentes de diuerssas nationes et claman la tierra Alamo.

Referencias

  1. ↑ (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024 (accesible vía web).
  2. ↑ Libro de los Emperadors

Content Disclaimer

Informasi ini disarikan dari Wikipedia dan disajikan kembali untuk tujuan edukasi. Konten tersedia di bawah lisensi CC BY-SA 3.0. Kami tidak bertanggung jawab atas ketidakakuratan data yang bersumber dari kontribusi publik tersebut.

  1. The information displayed on this website is sourced in part or in whole from Wikipedia and has been adapted for the purpose of restating it. We strive to provide accurate and relevant information, however:
  2. There is no guarantee of absolute accuracy. Wikipedia is an open, collaborative project that can be edited by anyone, so information is subject to change.
  3. It is not intended to constitute professional advice. The content displayed is for informational and educational purposes only. For important decisions (e.g., medical, legal, or financial), please consult a professional.
  4. Content copyright. Wikipedia is licensed under the Creative Commons Attribution-ShareAlike License (CC BY-SA). This means that content may be reused with appropriate attribution and shared under a similar license.
  5. Responsible use. Any risk arising from the use of information from this website is entirely the responsibility of the user.