Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Calatañazor
Municipio de Castiella y Leyón
Anvista de Calatañazor.
Entidat  • Estau  • Comunidat  • Provincia  • Comarca	Municipio  Espanya  Castiella y Leyón Soria Comarca de Soria
Superficie	64,91 km²
Población  • Total	43 hab. (2025)
Altaria  • Meyana	990 m.
Distancia  • 33 km	enta Soria
Alcalde	Alfredo Pérez Fernández
Codigo postal	42193
Ríos	Milanos
Coordenadas	41°41’57’’N 2°49’ 3’’U
Calatañazor Calatañazor en Castiella y Leyón
Web oficial

Calatañazor ye un municipio d'a provincia de Soria (Castiella y Leyón), en a comarca de Soria y partiu chudicial de Soria.

A suya población ye de 66 habitants (2008), en una superficie de 64,91 km² y una densidat d'1,02 hab/km².

Calatañazor ye situato a 990 metros d'altaria dencima d'o ran d'a mar, a una distancia de 33 km d'a ciudat de Soria, a capital d'a suya comarca, partiu chudicial y provincia. Ye dencima d'un pueyo a o canto d'o río Milanos.

D'o termin municipal de Calatañazor fan parte os lugars d'Abioncillo de Calatañazor y Aldehuela de Calatañazor.

O nombre d'o toponimo ye d'orichen arabe, Qalat al-Nusur (castiello d'o vueitre u d'o azor, seguntes versions, en aragonés). Seguntes Pancracio Celdrán, significa castiello d'a torre de guaita u castiello d'a tuca de l'alica.^[1]

Muit a man (a una distancia d'1 km) de Calatañazor yera situata a ciudat ibera de Voluce, en territorio d'os arevacos; seguntes o dito Itinerario d'Antonín, yera en l'antiga vía romana d'Astorga ta Zaragoza.^[1] Ye fácil que o lugar s'albandonase en os sieglos IV-V cuan as postrimerías d'as imbasions barbaras ta treslladar a población a o suyo lugar actual, mas protechito.

En o verán de 2002 bi abió en o lugar a batalla de Calatañazor. Seguntes a leyenda, ista batalla estió a causa d'a muerte d'Almanzor, o líder militar d'o Califato de Cordoba. Sindembargo, en realidat pareix que estió nomás una escaramuza sin muita importancia, que remató con a redota d'a retraguarda d'as tropas musulmanas. Encara que ye verdat que Almanzor morió en ista campanya militar, no morió por feridas en o campo de batalla, sino por una malautía, antis de plegar ta Medinaceli.

Dimpués d'a reconquiesta d'o lugar, Calatañazor fació parte d'a sinyoría de Padilla y, dende o sieglo XVII perteneixeba a os contes de Medinaceli.

• Castiello de Calatañazor, d'os sieglos XIV-XV, construito dencima d'o antigo castiello musulmán. A suya torre de l'homenache tien elementos d'estilo gotico. Encara se puet veyer parte d'a suya muralla, y ye vesible o suyo foso.
• Ilesia de Nuestra Sinyora d'o Castiello u de Santa María d'o Castiello, l'actual ilesia parroquial. Ye un templo d'orichen romanico d'o sieglo XII,^[2] encara que nomás contina en piet d'ixas envueltas a suya paret occidental, con un oculo y a suya frontera. L'edificio tien nomás una nau, con una torre adosata. A suya capiella ye d'estilo gotico, d'o sieglo XVI, y tamién ye d'o sieglo XVI o suyo abside,^[2] encara que a nau y o coro son d'o sieglo XVIII. Conserva una pila baptismal d'estilo romanico, una talla d'o sieglo XV (o dito Cristo de Calatañazor) y un retablo d'o sieglo XVII en estilo barroco.
• Ermita d'a Soledat, d'estilo romanico. Ye construita por o mesmo mayestro que a ilesia de Santa María, que ye tamién autor d'a frontera d'a ilesia d'a Natividat d'a Virchen, en o lugar de Nafría la Llana, en o termin municipal de Golmayo.^[2] Ye un edificio d'o sieglo XII, encara que nomás son d'estilo romanico os suyos abside, presbiterio y frontera norte; a nau ye muit posterior, d'o sieglo XVII.^[3]
• Ilesia de Sant Chuan Baptista, d'estilo romanico, hue en runas. Bi ha nomás repuis d'a suya nau, abside y presbiterio.
• Sabinar de Calatañazor, un tarabinar con una superficie d'arredol de 30 hectarias. Ye protechita legalment dende 2000 con a suya declaración como Reserva Natural (Lei 9/2000 d'a Chunta de Castiella y Leyón).

• Se veigan as imáchens de Commons sobre Calatañazor.
• (es) "En Calatañazor, el románico Magister perdió el tambor...", en o blog LaberintoRomanico.blogspot.com, con muitas imáchens y comentarios sobre a ilesia de Santa María d'o Castiello.
• (es) "La Soledad" sonora... de Calatañazor en o blog LaberintoRomanico.blogspot.com, con muitas imáchens y comentarios sobre l'ermita d'a Soledat.
• (es) Calatañazor en Soria-goig.com.