Body Combat

El Body Combat ye un tipu d'aeróbic coreografiáu basáu nes artes marciales y con un fin d'entrenamientu cardiovascular. Creáu en 1998, forma parte del conceutu Body Training System de la empresa Les Mills.

Una clas de Body Combat dura al rodiu de 60 minutos y compónse de 10 canciones, caúna con un oxetivu específicu pal entrenamientu y la puesta en forma.

El Body Combat nútrese de delles artes marciales, davezu:

• boxéu
• kick-boxing
• kárate
• taekwondo
• muay thai
• tai chi chuan
• capoeira

Anque los exercicios tean basaos en movimientos estrayíos d'estes disciplines, el Body Combat nun ye un arte marcial en sigo mesmu. Asina y too un entrenamientu regular permite conocer delles téuniques de defensa personal y algamar enfotu.

Exercicios

1. Calentamientu: exerciciu subdividíu en dos partes, caúna embobinada a calentar respeutivamente la parte alta y la parte baxa del cuerpu. Demientres esta fase apriéndese la mayor parte de los movimientos.
2. Combate 1: imitación d'un combate contra un adversariu ficticiu.
3. Potencia 1: exerciciu cardiovascular siguiendo’l ritmu u se trabaya la velocidá, la potencia y l'endurecimientu.
4. Combate 2: segunda imitación de combate, más intensa que la primera.
5. Potencia 2: exerciciu que trabaya l'endurecimientu de la parte alta del cuerpu solamente.
6. Combate 3: tercer imitación de combate, d'una intensidá menor que la segunda pero que prepara’l combate final.
7. Muay Thai: asaltu final. Esta fase ye la más intensa porque ye enforma esixente en potencia, velocidá y endurecimientu.
8. Potencia 3: exerciciu cardiovascular final que solicita sobre too los costazos.
9. Entrenamientu de la fuercia: exercicios de musculación en suelu, u s’alternen polo xeneral fases de fortalecimientu abdominal y planches.
10. Estiramientos: reposu de los músculos y relaxación.

Según Les Mills, lo mesmo que’l Body Attack el Body Combat ye un exerciciu cardiovascular esixente, que permite ameyorar la condición mental y l'enfotu. Tamién permite aumentar la densidá de los güesos.

Poro, los sos beneficios son físicos y psíquicos al empar. D'un llau, el body combat combina un trabayu de fortalecimientu muscular con una aición cardiovascular. Tamién permite fortalecer la velocidá y l'axilidá.

Dende un puntu de vista psicolóxicu, al aviesu de delles artes marciales que necesiten un deprendimientu llargu, el body combat ye sobre too lúdicu, lo que permite canalizar l'agresividá y amenorgar l'estrés.

Una sola sesión permite quemar ente 600 y 800 kcal.

Tienen la misión de concebir y d'enseñar les coreografíes (anovaes cada tres meses). Asoleyáu en 1999, el Body Combat tuvo como primeros direutores de programa a Nathaniel Leivas y a la so muyer Gabriela, llamaos Nath & Gab. Con un estilu más bien flexible, dirixeron el programa hasta’l 2004, cuando foron sustituyíos polos actuales direutores Dan Cohen y la so muyer Rachael Newsham, llamaos Dan & Rache. El so estilu bramente téunicu y la so escoyeta de músiques rápides y rítmiques contribuyeron a facer del Body Combat una actividá bien popular nos ximnasios de tol mundu.

L’eleváu grau de téunica de les clases implica, pa los prauticantes regulares, un verdaderu dominiu de dellos movimientos d'artes marciales, siendo los más importantes:

• Los golpes de puñu: “jab”, “cross”, “crochet”, “uppercut”, “coldazu”.
• Los golpes de pie: “patada frontal”, “patada circular”, “patada llateral”, “patada haza atrás”, “patada frontal en saltu”, “rodiyazu”.
• Los movimientos circulares: ginga, esquite.

Hai que tener en cuenta tamién qu'una gran mayoría d'instructores de Body Combat son titulares de cinturones negros d'una o más artes marciales, como’l kárate, el taekwondo, el full contact y el kick-boxing.

Body Combat y artes marciales tán polo tanto ciñidamente venceyaes, pero nun se tracamundien. En teoría un maestru d'artes marciales ye quien pa ser instructor de Body Combat. Pero los prauticantes tienen que s’entrenar davezu al envís de dominar dellos movimientos.

• AEFA (Actividaes Españoles de Fitness y Aerobics). Body Combat Archiváu 2011-09-27 en Wayback Machine