Flunkyball
Partida de flunkyball nun festival.
Mínimu de xugadores	2
Máximu de xugadores	ensin valor

El flanquibol, flunkyball ([ˈflʌŋkiˌbɔːl] o [ˈflʊŋkiˌbal]) o bierball,^[1] ye un xuegu de bébora nel que compiten dos equipos ente sí.

Los equipos colóquense en fila, unos enfrente de los otros, a una distancia d'aproximao 10 metros. El númberu de xugadores por equipu nun ta fixáu, pero lo más común ye que haya ente 3 y 8 persones por equipu. Cada xugador tien una botella o llatina de cerveza delantre, puesta nel suelu y abierta.

Nel centru del campu, ente los dos equipos, hai un oxetivu, que normalmente ye una botella de plásticu enllena de líquidu ente un cuartu y la metá de la so capacidá. Los xugadores tienen qu'arrojar la pelota pa dar nesti oxetivu y tiralu. L'equipu que tien la pelota dispón d'un intentu pa dar nel oxetivu con ella. Si lu tira, l'equipu que fixo'l llanzamientu puede empezar a béber cerveza, tanta y tan rápido como puedan.

L'equipu contrariu tien que volver poner en pie l'oxetivu y llevar la pelota detrás de la so propia llinia. Cuando l'equipu contrariu restitúi'l campu de xuegu, griten bien alto "¡Stop!", momentu nel que l'equipu que llanzó tien de cesar dafechu de béber. Cuando dambos equipos vuelvan tar preparaos, l'otru equipu puede facer el so llanzamientu. Cuando un equipu acabe de béber toles sos cervezas, gana la partida.^[2]

Pue haber sanciones si, por exemplu, un xugador empieza a béber enantes de tiempu, sigue bebiendo dempués del gritu de "¡Stop!" o si vomita. Tamién se penaliza'l derrame de cerveza (por exemplu, cuando la botella rebosa por demasiada espuma o se vuelca). Les sanciones posibles inclúin una "cerveza de penalización" pal infractor, la perda d'un turnu de llanzamientu o un traguu a favor del equipu contrariu. Lo que se considera infracción y la forma de sancionalo varía según el llugar.^[3][4][5]

Les normes del flunkyball varíen d'un llugar a otru y a menudo determínense al empiezu de la ronda, o inclusive mientres el xuegu. Les distancies ente los llanzadores y l'oxetivu son variables. N'algunes versiones, abonda con poner l'oxetivu en pie pa gritar "¡Stop!", ensin tener de llevar la pelota a la llinia del equipu.

En cuenta d'una pelota, tamién se puede usar una botella de plásticu o hasta una cebolla como oxetu pa arrojar. En cuenta de cerveza, la partida tamién puede xugase con bébores ensin alcohol, como refrescos o agua. La cantidá que se bebe tamién varía, aunque lo más común son botelles ente 0,5 y 1,5 litros.

El flunkyball xúgase normalmente nel branu y en espacios verdes, como parques y xardinos. Tamién ye común velu en festivales de música. Ye especialmente popular na cultura estudiantil y ente universitarios alemanes. Por exemplu, l'Institutu Tecnlóxicu de Karlsruhe celebra un campeonatu añal de flunkyball.^[6]

La competición más grande de flunkyball en Alemaña celébrase n'Elmshorn cada mayu. Ye curiosu que'l términu flunkyball ye común nos países de fala alemana, pero desconocíu nel mundu anglófonu.

El récord mundial actual de la ronda más grande de flunkyball xugada nunca tuvo llugar el 31 de mayu de 2024 en Leipzig, onde 1323 persones xugaron una ronda d'esti deporte a la vegada, siendo conocíu nesa ciudá como bierball.^[7]

Les primeres partíes de flunkyball xugáronse a principios de los años 2000 y xugábense con llates de cerveza nel centru, que había que tirar. Nes primeres variantes, xugábase con un puck (una llatina de cerveza apastada en forma de discu d'ḥoquei), una pelota o un palu. Cola introducción en Alemaña de la obligación de pagar un depósitu fixu poles llates de cerveza el 1 de mayu de 2006, la variante con puck foi cada vez menos común.

El primer campeonatu mundial celebróse en 2005 en Darmstadt, onde un equipu de Dillenburg llogró la victoria.^[8][9]

Nun videoclip de la banda Kraftklub de Chemnitz amuésase una partía de flunkyball.^[10]

Flunkyball ye tamién el títulu d'una película de ficción d'Alexander Adolph del añu 2023. El xuegu apaez solo nuna única escena cargada de simbolismu.

• Wikimedia Commons acueye conteníu multimedia sobre Flunkyball.
• Flunkyball en Spielwiki.