Ión
group or class of chemical entities (en)
charged particle (en) y molecular entity (en)

L'ión, en química y en física, ye un átomu o una molécula cargaos llétricamente, pola mor de tener ganao o perdío electrones de la so dotación normal, lo que se conoz como ionización. Tamién suel nomase molécula llibre. El plural ye iones.

Los iones cargaos negativamente, producíos pola ganancia d'electrones, conócense como aniones (que son atrayíos pol ánodu) y los cargaos positivamente, consecuencia d'una perda d'electrones, conócense como cationes (los que son atrayíos pol cátodu). Suelen representase col símbolu del átomu correspondiente y el símbolu "+" o "-" respeutivamente pal anión y catión (p.ex. Na⁺, F^-). Si'l númberu d'electrones ganáu o perdíu ye más grande qu'ún, tamién s'indica (p.ex. Mg²⁺).

La pallabra "ión" provién del griegu ión, participiu presente d'ienai ("dir", d'ehí "el que va"). "Anión" significa el que va pa riba. "Catión" significa el que va pa baxo. "Ánodu" significa el camín pa riba. "Cátodu" significa el camín pa baxo (del griegu hodos=camín, vía).

Michael Faraday foi'l primeru que propunxo la esistencia de los iones, en 1830, pero foi Arrhenius el que desenrolló la teoría correspondiente en 1884, cosa que-y valió'l Premiu Nobel de Química de 1903.

Pa simples electrones nel vaciu, esisten constantes físiques asociaes col procesu d'ionización. La enerxía necesaria pa quita-y electrones a un átomu denómase enerxía d'ionización, y el potencial llétricu equivalente (ye dicir, la enerxía dividida ente la carga d'un solu electrón) conozse como'l potencial d'ionización. Estos términos tamién s'empleguen pa describir la ionización de les molécules y los sólidos, pero los valores nun son constantes pola mor de que la ionización pue resulta afeutada pola temperatura, la química y la xeometría llocales.

Xeneralmente los potenciales d'ionización amenorguen d'arriba a abaxo, y crecen d'esquierda a drecha na tabla periódica. Esta tendencia ye inversa a la del radiu atómicu. Esto ye debío al fechu de que, n'átomos pequeños, los electrones son atrayíos más fuertemente pol nucleu y fai falta más enerxía p'arrincalos.

El primer potencial d'ionización ye'l necesariu p'arrincar el primer electrón d'un átomu neutru, el segundu potencial ye'l necesariu p'arrincar dos electrones, y asina socesivamente. Los potenciales d'ionización van incrementándose gradualmente. Xeneralmente hai un saltu considerable d'enerxía en dalgún puntu de la serie. Esto fai que cada átomu tienda a formar una cierta mena de catión. Por exemplu, el sodiu (Na) forma Na⁺, pero non Na²⁺.

• Wikimedia Commons acueye conteníu multimedia sobre Ión.