El videozugo^[1] el ze un zugo jestìo da un dispozidivo ełetrònego che el parmete de interajir co łe imàjine de un schermo. El tèrmene zenaralmente l'ìndega un software, ma in serti cazi el połe referirse anca a un dispozidivo hardware dedegà a un spesìfego zugo. Chi che el dòpara un videozugo el vien ciamà "videozugador" o "gamer" e el se serve de una o pì perifèreghe de input 'fà el joystick, ła tastiera, el gamepad evc.

El ze nasesto za a partir da i ani 1950 inte i anbienti de reserca sientìfega e inte łe facoltà univarsitarie meregane, e'l ga vù el só dezviłupo a partir da ła seconda metà de i ani 1970.

Come calsìase zugo, el videozugo el połe raprezentar robe astrate o reprodur sinbołegamente determinadi contesti culturałi, ciapàndołi fora dal só ànbito e aplegàndołi a contesti e situasion che i połe ndar da ła simułasion pì fedełe a ła parodìa. Da ła nàsita, i videozughi i se ga drioman evołùo formando man man dei zènari conpletamente difarenti tra de łori, co mecàneghe de zugo difarente e difarente abiłità dimandà al zugador. I prinsipałi grupi inte i cuałi A se połe divìdar i videozughi i ze do: simuładivo o arcade.

Un zugo simuładivo l'è un zugo bazà so ła simułasion de łe règołe del mondo reałe; chi che l'opta par programar un zugo orientà so 'sto zènare el sa che el zugador el vołe pasar anca ore del só tenpo zugando a calcosa de mìa za visto e difìsiłe asà. Un zugo de guida co ła reałe raprezentasion de ła fìzega, opur un zugo de guera indóe che co un soło colpo ła partìa ła fenise, i ze òtemi ezenpi. El zugo arcade invese l'è l'ezato oposto. Chi che el serne un zugo arcade no'l ga voja de ndarghe drio a l'aprendimento de łe mecàneghe de un zugo masa conplegà, e el só ùnego deziderio el ze cueło de aviar el zugo e gòdarseła a l'istante, evitando se posìbiłe de łèzar el manuałe.

1. ↑ sevente difarenti grafie e varianse anca scrito videoxogo o videoxugo