El Villard blanc xe un ibrido otegnest inte i primi del noveçento da Victor Villard e Bertille Seyve intel sud ovest de ła Fransa. El xe el resultat de l'insembrament de do ibridi otegnesti da Albert Seibel uxando come sorxent de ła rexistensa deverse speçie de vide ameregane ma in prevałensa Vitis rupestris, mentre tra łe qałitá de V. vinifera ga contribuest soratut vide locałi come l'Aramon. Inte el pedigree del Villard blanc ghe xe anca el Dattier (sin. Rexina) da cui provabiłmente vien a forma ovałe de i granełi.

El xe na quałità de ibrido bastansa tardiva che ła voe caldo par maturar parció no ła xe adata a łe region del nord come altri ibridi (esempio: Seyval). El xe vigoroxo e rexistent a łe małatie. se mała na scianta de peronospora solke in condision tanto favorevołi a ła małatia.

Da cò xe sta sełesionà fin a i ani sesanta del noveçento el Villard blanc ga vest na gran diffusion. Defati, par el flajel de vigne de la fiłosera e a devastasion de łe guere, se ga dovest repiantare e vide e xe stat sielt i ibridi par a so rexistensa a łe malatie. Soratut inte ła zona del Armagnac e del Cognac el Villard blanc xe stat uno de i preferei par i novi impianti par via de ła produsion bondante e de bona quałitá. Inte i ani sesanta el jera ła tersa quałità de ua in fransa dopo Ugni blanc (Trebian) e Chardonay. El xe rivá anca in Veneto. Pi tardi łe lexi comunitnrie par difender i vini europei ga causa el espianto del Villard blanc come de chialtri ibridi. Ancuo te ło trovi isolá visin a łe caxe o qualke cialt pa łe campanie. Xe comunque na quałità de importansa parchè el xe stat doparà par otegner tanti de i ibridi de ła generaxion sucesiva, el xe, ad exempio el xenitor de ła Bianca.

Pianta: vigoroxa, na scianta cespułiosa con raixe fonde (come V. rupestris). otima fertiłità, pol portar anca 3 raspi so par cavo e fa ua anca i cavi de i oci de ła corona. Cavo: a sesion tonda de color arancio. El rasp xe tacá alt. Foja: media-grande, lisia, parsora no bołosa color verde medio, parsot glabra cò e vene poc in fora e el pecolo ros. Rasp: mèdio ramificà. Granel: medio, ovałe.