Alles
Alministración
País	España
Autonomía	Principáu d'Asturies
Provincia	provincia d'Asturies
Conceyu	El Valle Altu de Peñamellera
Partíu xudicial	Llanes
Tipu d'entidá	parroquia d'Asturies
Códigu postal	33578
Xeografía
Coordenaes	43°20′02″N 4°42′20″W / 43.33379°N 4.70567°O / 43.33379; -4.70567
Alles Alles (Asturies)
Superficie	17.61 km²
Altitú	263 m y 241 m[1]
Llenda con	Llonín, Mier, Trescares, Ruenes, La Borbolla, Purón y Vidiago
Demografía
Población	158 hab. (2024)
Porcentaxe	31.6% de El Valle Altu de Peñamellera
Densidá	8,97 hab/km²
Viviendes	147 (2001)

Alles^[2] ye un llugar y una parroquia del conceyu asturianu d'El Valle Altu de Peñamellera, de 17,61 km²^[3] d'estensión y 158 habitantes (2024)^[4]. Nun hai namái qu'un pueblu nel so territoriu: la villa d'Alles, capital del conceyu dende 1869.

La villa s'asitia na fastera meridional de la sierra del Cuera, nuna llanada a 263 m sobre'l nivel de la mar que ta arrodiada de cumales. Fórmenla dellos barrios (Bellaces, Besnes, El Toju, El Pedrosu, L'Aldea, La Cal, La Cuesta, Las Barras, Las Coronas, Las Jilgueras, Llumberu, Pastorias, San Roque, Socampu y Trespalacios) que s'esparden alredor del nucleu principal del pueblu, nel que s'alcuentren la casa conceyu y la ilesia parroquial.

L'orixe de la población ye antiguo. Cerca d'ella s'alcuentren los restos de la ilesia románica de San Pedru de Plecín, que, anque datada nel sieglu XII, parez asentase nel llugar ú había otra ilesia, quiciás del tiempu del reinu d'Asturies. Nun hai muncha mención esplícita del llugar na documentación medieval, porque la capital del Valle de Peñamellera yera Abándames. Sicasí, cuando se decretó nel 1833 la vuelta de la Peñamellera a la provincia d'Uviéu, Alles peleó por ser la capital del nuevu municipiu. Al dixebrase esti en dos, en 1869, convirtióse na capital del Valle Altu, y yá nun perdió esa condición.

Na Guerra Civil la villa, como'l restu del conceyu, foi l'escenariu de sangrientos combates ente los republicanos y les brigaes navarres del bandu nacional, que rindieron la población el 15 de setiembre de 1937.

Destaca perriba de too, nel so caseríu, la ilesia parroquial de San Pedru, d'estilu barrocu. Ente'l so pórticu principal y l'edificiu de la casa conceyu pasa el camín que, tres cruciar el barriu Llomberu, mos lleva a los restos de la ilesia de San Pedru de Plecín, que foi cabeza de la parroquia primero de que se ficiera l'edificiu barrocu.

Amás d'esos edificios, que se describen nos artículos correspondientes, hai otros trés edificios relixosos nel pueblu:

• La capiella de Nuestra Señora del Rosariu, nel barriu del campu Llumberu. Ye de propiedá particular, con planta rectangular simple y un pórticu pequeñu.
• La capiella de San Roque, nel barriu homónimu. De planta rectangular simple, pieslla al esterior con reya de madera. Tien un pequeñu campanariu y, nel interior, una cabecera cubierta con bóveda d'estrella y un retablu de madera cola imaxe del santu.
• La capiella de la Reina de los Ánxeles, nel barriu d'El Pedrosu. Ye la capiella d'un conxuntu palaciegu (la Casona d'El Pedrosu) propiedá de la familia de los Mier, y foi llevantada nel sieglu XVIII. Comunicaba direutamente col palaciu por un ventanal que se peslló nos años 50, mentantu que los vecinos entraben pela puerta que, protexida por una reya, ye la entrada actual al templu. De planta rectangular y nave única, cubre al interior con bóveda de cañón con llunetes peles qu'entra, al traviés de trés ventanales, la lluz al recintu. Tien, perriba de la puerta pola que se pasa a la sacristía, un retablu contemporaneu a la so construcción y recientemente restauráu. Les imáxenes sagraes, por embargu, son recientes y de pocu valir.

Hai, tamién, destacaos exemplos d'arquiteutura civil. Tenemos, asina,restos d'un torruxón medieval, la Torre de Llumberu, nel barriu homónimu. De planta circular, con unes muries de 70 cm d'anchor y un diámetru internu de 4,60 m, parez que formaba parte d'una red defensiva de torreones que protexíen el territoriu que va de la Sierra del Cuera al Picu Peñamellera. Y un palaciu, la yá mentada Casona d'El Pedrosu, alteriada poles reformes que se-y ficieron al pesar de los años pero qu'entá caltién restos del so esplendor pasáu. Na so fachada principal apaez l'escudu de los Mier cola lleenda "Adelante el de Mier por más valer".

El patrimoniu arquiteutónicu del pueblu complétase con delles casones construyíes con capital indianu. Pueden nomase equí, ente más otres, Villa Mier (1928) y Villa El Jacal (1948), asitiaes na curvona que fai la carretera AS-345 al cruciar el pueblu; y Villa Amparo, cerca de la ilesia.

• L'Aldea
• Las Barrás
• Besnes
• La Cuesta
• Pastorias
• El Pueblu
• Trespalaciu

• Cabal Viescas, Arturo José, Arte por concejos. Cabrales, Onís, Peñamellera Alta y Peñamellera Baja. Uviéu, Cajastur, 2004.
• Noriega Bada, Víctor Manuel, Un día en Peñamellera Alta. Uviéu, KRK Ediciones, 1999.
• Toyos de Castro, Ana Belén, Peñamellera Alta en VV.AA., Asturias a través de sus concejos y un gran atlas de la región. Uviéu, Editorial Prensa Asturiana, 1998.

• Wikimedia Commons acueye conteníu multimedia sobre Alles.

• Alles n'OpenStreetMap.

	Parroquies d'El Valle Altu de Peñamellera
Alles | Cáraves | Llonín | Mier | Oceño | Rozagás | Ruenes | Trescares